دا لارښود د افغانستان په ګاونډیو هېوادونو کې د پناه غوښتنې په اړه معلومات وړاندې کوي. دا په هند، ایران، پاکستان، تاجکستان، ترکیې، ترکمنستان او ازبکستان کې د پناه غوښتونکو د حقونو او راجستریشن بهیرونه په ګوته کوي. نورې سرچینې او د اړیکو معلومات د لا ډېرو مرستو لپاره چمتو شوي.
د دې لارښود منځپانګه د کډوالۍ نړیوالې مرستې پروژې (IRAP) لخوا لیکل شوې او همدارنگه دلته د IRAP حقوقي معلوماتو وېبپاڼه کې هم شتون لري. دا وېبپاڼه د ځینو کډوالو لپاره د قانوني پروسو په اړه عمومي معلومات وړاندې کوي. دا د انفرادي غوښتنو لپاره د قانوني مشورې په معنی نه دی. دا معلومات د ۲۰۲٣ کال د اګسټ په مياشت کې اپډېټ شوي او کېدی شي شرطونه او اړتیاوې بدلې شي. نو له دې امله، تل د حکومت يا هغې ادارې کوم چې ستاسو د غوښتنې په اړه پرېکړه کوي، نوي شرطونه او اړتیاوې یې وګورئ.
وپوښتئ دا معلومات د IRAP په رضایت سره خپروي څو ډاډ ترلاسه کړي هغه افغانان چې د کره او باوري معلوماتو په لټه کې دي په اسانۍ سره ورته لاسرسی ومومي.
لنډیز
دا لارښوود د افغانستان په ګاونډیو هیوادونو کې د پناه غوښتنې د درخواست په اړه معلومات وړاندې کوي. هغه حقونه چې پناه غوښتونکي ورته لاسرسی لري، په بیلابیلو هیوادونوکې توپیر لري. د افغانستان په ډیر شمیر ګاونډیو هیوادونو کې پناه غوښتونکي قانوني استوګنې، کار او مالي ملاتړ ته ډیر محدود لاسرسی لري.
هند
نوي راغلي کډوال چې د پناه غوښتنې په لټه کې دي باید د کډوالو په چارو کې د ملګروملتونو کمیشنرۍ UNHCR سره اړیکه ونیسي او په دې اداره کې د پناه غوښتونکي په توګه خپل نومونه ولیکي.
د کډوالو په چارو کې د ملګروملتونو کمیشنرۍ UNHCR په هند کې د افغان پناه غوښتونکو لپاره معلومات او همداراز په هند کې د پناه غوښتونکو د نوم لیکنې د لړۍ په اړه معلومات (چې په دري او پښتو ژبو ترلاسه کیدی شي)، خپاره کړي دي.
د متحده ایالاتو سفارت او کنسلګرۍ په هند کې موقعیت لري او کیدی شي متحده ایالاتو ته د کډوالۍ غوښتنلیکونه طی مراحل کړي.
ایران
د 2021 کال د اګست له 27 مې څخه، د ایران دولت دا روښانه کړې نه ده چې ایا هغه کسان چې له افغانستان څخه دې هیواد ته راځي کولی شي د پناه غوښتنه وکړي که نه او د پناه غوښتنې د غوښتنلیک طریقه څرنګه ده.
په ایران کې د پناه غوښتونکو نوم لیکنه د بهرنیو اتباعو او د بهرنیو کډوالو د چارو د ادارې له خوا ترسره کیږي. د کډوالو په چارو کې د ملګروملتونو کمیشنرۍ UNHCR په ایران کې د پناه غوښتونکو په اړه معلومات خپاره کړي دي. (دا معلومات په فارسي/دري ژبه ترلاسه کیدی شي)
د متحده ایالاتو دولت په ایران کې سفارت نلري او متحده ایالاتو ته د مهاجرت د غوښتنلیکونو طی مراحل په ایران کې ترسره کیدی نشي.
پاکستان
نوي راغلي کډوال چې د پناه غوښتنې په لټه کې دي باید UNHCR سره اړیکه ونیسي او په دې اداره کې د پناه غوښتونکي په توګه خپل نومونه ولیکي.
د کډوالو په چارو کې د ملګروملتونو کمیشنرۍ UNHCR په پاکستان کې د پناه غوښتونکو په اړه معلومات خپاره کړي دي. (دا معلومات په فارسي/دري او پښتو ژبو ترلاسه کیدی شي). په پاکستان کې پناه غوښتونکو لپاره د برابرو شویو خدمتونو په اړه معلومات هم د UNHCR په ویب پاڼه کې ترلاسه کیدی شي.
د متحده ایالاتو سفارت په پاکستان کې موقعیت لري او کیدی شي متحده ایالاتو ته د کډوالۍ غوښتنلیکونه طی مراحل کړي.
تاجکستان
تاجکستان ته نوي راغلي کډوال چې د پناه غوښتنه کوي باید دې هیواد ته له ننوتلو څخه یوه میاشت وروسته، د پناه غوښتونکي په توګه خپل نومونه ولیکي.
د کډوالو په چارو کې د ملګروملتونو کمیشنرۍ UNHCR په تاجکستان کې د پناه غوښتونکو په اړه معلومات خپاره کړي دي (چې په دري ژبه ترلاسه کیدی شي)
د متحده ایالاتو سفارت په تاجکستان کې موجود دی خو دا سفارت اوس مهال د هغو کسانو د کډوالۍ د ویزې غوښتنلیکونه نه پراسس کوي چې متحده ایالاتو ته د کډوالۍ غوښتنه کوي.
ترکیه
په ترکیه کې د پناه غوښتنې لړۍ د ترکیې د دولت له خوا اداره کیږي. د کډوالو په چارو کې د ملګروملتونو کمیشنرۍ UNHCR په ترکیه کې دفترونه لري او په ترکیه کې میشتو پناه غوښتونکو سره مرسته کوي.
UNHCR په ترکیه کې د پناه غوښتونکو لپاره معلومات (چې په فارسي ژبه هم ترلاسه کیدی شي) او په ترکیه کې د پناه غوښتونکو د نوم لیکنې د لړۍ په اړه معلومات (چې په فارسي ژبه ترلاسه کیدی شي)، خپاره کړي دي.
"د ترکیې د پناه غوښتونکو حقونه" یوه غیرانتفاعي اداره ده چې په ترکیه کې پناه غوښتونکو لپاره حقوقي معلومات او مرستې برابروي. "د ترکیې د پناه غوښتونکو حقونه" په ترکیه کې پناه غوښتونکو لپاره یو آنلاین پورټال لري (چې په فارسي او پښتو ژبو هم ورته لاسرسی موجود دی).
د متحده ایالاتو سفارت په ترکیه کې موقعیت لري او کیدی شي متحده ایالاتو ته د کډوالۍ غوښتنلیکونه طی مراحل کړي.
ترکمنستان
په ترکمنستان کې د پناه غوښتنې لړۍ د ترکمنستان د دولت له خوا اداره کیږي.
د متحده ایالاتو سفارت په ترکمنستان کې موقعیت لري او کیدی شي متحده ایالاتو ته د کډوالۍ غوښتنلیکونه طی مراحل کړي.
ازبکستان
د پناه غوښتنې لړۍ د ازبکستان د دولت له خوا اداره کیږي.
په مرکزي آسیا کې د کډوالو په چارو کې د ملګروملتونو د کمیشنرۍ UNHCR دفتر چې په قزاقستان کې موقعیت لري، د ازبکستان درخواست کوونکي هم تر پوښښ لاندې راولي. UNHCR په مرکزي آسیا کې د UNHCR د دفتر د اړیکې معلومات خپاره کړي دي.
د متحده ایالاتو سفارت په ازبکستان کې موقعیت لري او کیدی شي متحده ایالاتو ته د کډوالۍ غوښتنلیکونه طی مراحل کړي.
لازیات معلومات او نور هیوادونه:
تاسو کولی شۍ د افغانستان په ګاونډیو هیوادونو کې د کډوالو د حفاظت او د افغانستان اتباعو لپاره له ویزې پرته لاسرسي په اړه معلومات دلته ترلاسه کړئ.
تاسو همداراز کولی شۍ چې افغانستان څخه له وتلو وروسته، د کډوالو په چارو کې د ملګروملتونو کمیشنرۍ UNHCR څخه د مرستې غوښتنه وکړئ. UNHCR په ډیر شمیر هیوادونو کې د خپلو دفترونو او ځایي سرچینو په اړه معلومات ددې ویب پاڼې له لارې وړاندې کړي دي.
د "وپوښتئ" له کارپوهانو څخه د مرستې غوښتنه
هغه افغانان چې ځانګړو معلوماتو ته اړتیا لري، د "وپوښتئ" د معلوماتو مرکز ستاسو په خدمت کې دی. تاسو کولی شئ په انلاین بڼه د معلوماتو ترلاسه کولو لپاره د وپوښتئ "وټساپ شمېرې"(93729807235+) ، فېسبوک مسېنجر (Facebook Messenger) یا د وېبپاڼې د مسېنجر له لارې زموږ کارپوهانو سره اړیکه ونیسئ!
نور معلومات
هغه کسان چې په ټوله نړۍ کې د افغانانو لپاره د کډوالۍ، بیامېشتېدنې، ښوونیزو او لوړې زده کړې د پروګرامونو او د نورو بېلابېلو فرصتونو په اړه د لا ډېرو معلوماتو په لټه کې دي، او همدارنګه په افغانستان کې له نړیوالو سازمانونو څخه د بشردوستانه خدمتونو د معلوماتو او دولتي ادارو څخه د مدني اسنادو د اخیستلو د پړاوونو د پوهېدو په لټه کې دي، د "وپوښتئ" وېبپاڼې او ټولنیزو رسنیو ته مراجعه وکړي:
✓ د وپوښتئ وېبپاڼه (www.beporsed.org)